كيف تحصل على طاوله شاشات lcd او بلازما بارخص الاسعار .. التفاصيل بالداخل

السلام عليكم ورحمة الله وبركاته
اسعد الله اوقاتكم

الحقيقه الموضوع بدون صور حاليا لكن بحط كم صوره اليوم ان شاء الله او غدا

طبعا ذهبت ابحث عن طاوله للشاشه الي عندي وتفاجئت بالاسعار المبالغ فيها والي تبدى من 400 ريال وتصل الى 1600 ومافوق ولما تشوف الطاوله يمين يسار ماتلاحظ شي مميز يخليها بهالسعر الا ان راعي المحل يقولك ( هذي ماركه )

طيب بتكلم عن الطاولات الخشبيه الي في ايكيا وهي الانسب لشاشات ال سي دي
طبعا رحت لايكيا وحصلت طاوله من النوع الي يجي عريض عرضها تقريبا 2 متر وهي عباره عن ست ادراج ثلاث ادراج فوق وتحتها ثلاث ادراج وكلها مفتوحه بدون ابواب

ارتفاعها تقريبا 35 الى 40 سم
وعمقها للداخل ايضا من 35 الى 40 سم


لقيتها بسعر 500 وشوي ولقيت اصغر منها عباره عن اربع ادراج ب 350 تقريبا

المهم ما اقتنعت حقيقه وشفت ان السعر مبالغ فيه لان حتى الخشب احسه خفيف

وانا راجع للبيت واشوف محلات الموبيليا << ماعرف انطقها صح بس انها المحلات الي متخصصه بالديكور والخشب

جيت عند اول محل وطرحت عليه الفكره الي شفتها وقلت له ابي طاوله ارتفاعها 35 سم وعرضها مترين وفيها رفين مقسمه لست ادراج وعمقها للداخل 35 سم واللون ابيض كم تكلف

تقريبا الشكل الي اخترته نفس هذا بس بدون ابواب
اماميه وبدون قواعد او ارجل

[عزيزي الزائر يتوجب عليك التسجيل لمشاهدة الرابط للتسجيل اضغط هنا]

قالي بالبدايه 200 ريال قلت والله اذا بهالسعر ازيدها واشتري من ايكيا احسن

رحت للمحل الي جنبه قالي 150 وطبعا نفس الخشب الي اخترته عند المحل الاول يجي ناعم وفيه لمعه بسيطه ومتوفر منه الوان ابيض اسود اصفر احمر وردي ازرق ,, الخ

قلت برضو لا قالي كم يبغى : ) طبعا باكستاني قلت 100 ريال قال هذا تعب واجد قلت تبي 100 ماعندي غيرها قال خلاص 120 وصراحه ماحبيت اجادله قلت مو مشكله على الرغم انه كان بامكاني اخذها باقل لو درت اكثر بس اصلا انا وفرت كثير

طبعا لا تحسبوني بخيل لا والله لكن ما احب الاستغلال ودايم ابحث عن حلول

[عزيزي الزائر يتوجب عليك التسجيل لمشاهدة الرابط للتسجيل اضغط هنا]

المهم اتفقنا على المطلوب وجيته اليوم الثاني لقيته مخلصها بس انه غلط بالرفوف وخلها اثنين فوق بعض بدال سته قلت لا حبيبي قسمها مثل ماقلت لك ولا ماراح اخذها قال مو مشكله جيته المغرب الا وهي خالصه وفي كل درج فاتح فتحه دائريه للاسلاك

المهم وديتها البيت وحطيت عليها الشاشه وكانت رائعه بكل ماتعنيه الكلمه

طبعا تقدر تضيف عليها قزاز اسود من فوق وتكلفك القزازه من 70 الى 90 ريال على الحجم الي ذكرته وراح تزيد من جمال الطاوله ويطلع الاجمالي حوالي 190 ريال

طبعا انا حطيتها بدون قواعد بس تقدر تحط لها قواعد سودا بلاستك سواء كفرات او ثابته وتحصلها عند محلات الكنبات الوحده ب5 ريال او اقل وودها لنفس المحل يثبتها لك عشان تكون مرتفعه شوي عن الارض انا اشوف انها بدون القواعد افضل وشي مبتكر وجديد

ان شاء الله اليوم اوفر لكم صوره طبعا فيه افكار ثانيه مثل تحط لها ابواب زجاج او تخلي التقسيمه بشكل ثاني الي ابي اوصله انك راح توفر كثير جدا

بس انتبه اشرط على صاحب المحل يجيب خشب جديد وبدون مخوش لان بعضهم يستخدم خشب مستخدم من دواليب وغيرها فانتبهو
واشرط عليه بعد ان القطعه الي فوق الي هي السطح الي بتحط عليه الشاشه تكون قطعه وحده مو مجزئه

اي احد يتبع هالطريقه ياليت يطرح تصميمه للاعضاء عشان يستفيدون


تحديث

هذي الصور يا جماعه والنتيجه الي حصلت عليها باقل التكاليف علما باني لم اضع الزجاج بعد ولم اضع الاجهزه وبالامكان وضع ابواب زجاجيه للادراج الي بالاسفل وراح تظهر بشكل افضل وابواب الادراج الثلاثه تكلف تقريبا 60 الى 80 ريال بلون اسود طبعا

ابعاد الطاوله الي بتشوفونها الان

العرض : 2 متر

الارتفاع : 35 سم

العمق الى الداخل : 35 سم

اترككم مع الصور والمعذره الجوده رديئة لانها من كميرة جوال

[عزيزي الزائر يتوجب عليك التسجيل لمشاهدة الرابط للتسجيل اضغط هنا]

[عزيزي الزائر يتوجب عليك التسجيل لمشاهدة الرابط للتسجيل اضغط هنا]

[عزيزي الزائر يتوجب عليك التسجيل لمشاهدة الرابط للتسجيل اضغط هنا]

اجمل تحيه للجميع

مشكور اخي